??Kaaleeraq M Andersen: Politikki qinersinerup kingorna

Kaaleeraq M Andersen

Qinersineq 2018:
Qinersinermi annertuumik sakkortuumik qineqqusaartoqarpoq partiinit tamanit, qineqqusaarneq ataatsimut isigalugu eqqoriaruminaatsumik ingerlasimavoq partiillu sukataartut malunnarutik. Qinersinerup pissanganaqutaasa ilagaat partiit amerlisimammata marlunnik ilallutik.

Oqariartuut ataatsimoorneq: Soorunami apeqquserneqarsinnaavoq Naalakkersuisooqatigiinnissap saqqummiunneqarnera, qineqqusaarnermi annertuumik oqariartuutigineqarpoq ataatsimoornissaq partiit tamarmik suleqatigiinnissamik oqariartorput. Piffissalli takutippaa tamanna pisarnertut qineqqusaarutaannaasimasoq.

Qinersisartunut pissaganarsimasinnaangaluarpoq partiit tamarmik suleqatigiinnissaat imaluunniit amerlanerussuteqarneq eqqarsaatigalungu qinersisartut eqqarsaatigalungit ilaasortamik ataatsimik amerlanerussuteqarneq ilumut suleqatigiissinnaanermik takutitsinersoq, tutsuiginartumik nunarput ingerlanneqarnersoq apeqquserneqarsinnaavoq.

Soorunami politikki piviusorsiortumik isigalungu aaliagerneq Naalakkersuisooqatigiilernerlu aqqutissanit pitsaanerpaatut isigineqarsimanissaa naatsorsuutaasinnaavoq.

Partiit ajorsartut ajugaasullu

Siumut:

Siumut partiini suli anginersaangaluarluni kinguariarpoq, qinersinermit kingullermut naleqqiullugu Inatsisartuni ilaasortaatitaminit inissanik marlunnik annaasaqarpoq, 2013-mullu naleqqiullugu Inatsisartunut ilaasortaatitaat tallimanik akileriarput. Ukiulli tallimap ingerlanerani Siumumi ilaasortaasimasut nalunngisatsitut Hans Enoksen 2014-mi qinersinermi partiiliorpoq tassani Siumup qinersisaanik tigusilluartutut eqqaaneqarsinnaalluni, taassumallu kingorna Vittus Qujaukitsoq Siumumi siulittaasutut ajorsareernermi kingorna partiiliorpoq Nunatta Qitornai uanilu qinersinermi Inatsisartunut ilaasortaateqalerluni.

Taamaattumik Partii Naleqqap aammalu Nunatta Qitornaasa Inatsisartuni ilaasortaatitaat katillugit tallimaasut Siumut qinersinermit 2013-mut naleqqiullugu ilaasortat annaasaat taakkununnga partiinut qinersisimanerat eqqoriarneqarsinnaavoq.

Taamaattumik partii Siumup siunissaa eqqarsaatigalungu Inatsisartuni ilaasortaatitaasa amerliartunnginneri eqqarsaasersuutigineqarsinnaapput taamannallu igerlaannassangunik qinersinermi tulermi allatut iliortoqanngippat aamma kinguariaqqinnissaat eqqarsaasersuutaasinnaavoq.

Inuit Ataqatigiit:

Inuit ataqatigiit uani qinersinermi Inatsisartuni arfineq pingasunik ilaasortaatitaqalerput, Inatsisartunut 2009-mi qinersinermi 14-nik isertitaqarnikuullutik. Inuiat ataqatigiit Siumukkutulli qinersinerit kingulliit kinguariartorput partiillu annerpaatut taaneqartartut taama aamma annertutigisumik partiit annertujunnaarput.

Inuit ataqatigiit Siumumut unammerlertitut annerpaatut taaneqarsinnaapput kisiannili qinersinermut 2014-mut sanilliullugu Inatsisartuni ilaasortaatitaat pingasunik ilanngarput taamaattumillu ukiut kingulliit kinguariartuinnarlutik, uani eqqarsaatigineqarsinnaavoq aalisarnermut politikkerineqartoq kinguariarnermut pissutaasimasinnaasoq, taamaattumillu Inuit Ataqatigiit pitsaanerusumik ingerlariaqqissagunik allaanerusumik iliortariaqarput soorlu Siumumi.

Inuit Ataqatigiit uani qinersinermi ajorsartutut taaneqarsinnaapput aammalu Naalakkersuisooqataareerlutik massakkut Naalakkersuisooqataaniannginnerat namminermini ajorsarneruvoq, tutsuiginartumillu qinersisartunut ingerlaannassagunik qinersinissap tullissaanut apeequtinut annertuunut qanoq politikkeqarniarnertik annertuumik eqqartortariaqarpaat aammalu massakkumit nakuunerusumik siulittaasoqarnissaq imaluunniit ingerlariuseqarnissaq periarfissarsiuuttariaqarpoq.

Demokraatit:

Uani qinersinermi Demokraatit ajugaasutut taaneqarsinnaapput, tassami taakkuupput partiini siuariarnerpaat. Uani Demokraatit qinersinermi torrallaassutigaat ilinniagartuumik inuiaqatigiinnilu nalunnginneqarluartoq Niels Thomsen sassarmat qinersinermilu amerlasuunik 2.773-nik taajuunneqarluni siulittaasuminiillu Randi V Evaldsennimit tallimariaammit taajuunneqarluni. Demokraatit taamaaliorsimanngikkaluarunik kinguariarnissaat ilimanarsimasinnaangaluarpoq, assersuutigalungu Demokraatini Nivi Olsen 2014-mi Inatsisartunut qinersinermi 1.428-nit taajuunneqarsimasoq qinersineq una 874-nik taajuunneqarmat, taamaattumik Niels Thomsen Demokraatinut politikkimullu uteqqinnera Demokraatinut iluatsitsineranut pingaarutilerujussuuvoq taamaaliorsimanngikkunillu unammerlertigilikkaminnut Suleqatigiissitsisunut unamminerusumanissaat ilimanarsimassagaluarpoq Demokraatini ilaasortaasimasunit Michael Rosing-mit aammalu Inatsisartunut ilaasortanngortumit Tillie Martinussennimit.

Demokraatit siunissaat isigalungu taamatut siuariartornertik ingerlatiinnassangunikku partiit annerpaanut unammillernissaat qanittuararsuuvoq, qinersinermi tullermi ilamanaateqarsinnaapput Demokraatit partiit annerit arlaat paarlassinnaagaat Inatsisartunilu ilaasortaatitatik tullissaanimut amerliseqqissinnaagunikkit Demokraatit siunissaat annertunerunissaat ilimanaateqarpoq.

Demokraatit ilisimatusartunit inuusuttunillu illersorneqarnerat uani qinersinermi malunnarpoq, taamaattumillu qinersisartut inuusussiartornerinit malitseqartumik nunatsinni Liberaalimik politikkeqarneq annertusiartornissaa ilimanarluinnarluni Demokraatit taamatut siuariartornertik ingerlatiinnassagunikku.

Partii Naleraq:

Partii Naleraq uani qinersinermi Inatsisartuni sisamanik ilaasortaatitaqalerput taamaattumillu kinguariartortutut oqaatigineqarsinnaanatik, Partii Naleqqami qinersinermi kingullermi Inatsisartunut pingasunik isertitaarsimallutik massakkut ataatsimik amerleriarput.

Siumup siulittaasorisimasaa Hans Enoksen qinersisaai isigissagaanni 2014-mut naleqqiullugit nikigavallaanngikkaluartut partiip qineqqusaartitaat amerlanerisigut piukkunnartunillu qineqqusaartitaqarnerisigut agusaq pitaasoq anguneqarsimanasorinarpoq. Inatsisartunummi ilaasortaasimasunit siulitttaasoq kisiartaalluni iseqqippoq, Henrik Fleischerip sinniisussatut Inatsisartuni issianikuunera eqqaassanngikkaanni.

Partii Naleqqalli uani iluaqutigissavaa Naalakkersuisooqataaqqilernissani uanimi qineqqusaarnermi suleqatigiinneq ataatsimoornissarlu qineqqusaarutigineqartoq piviusunngortimmassuk, Naalakkersuisuutitaqalernerullu kingorna Partii Naleqqami sinniisussanit ilalerneqarnissaat partiimut allisaataallunilu iluaqutaassaaq, soorunami Naalakkeruisunngortussap Inatsisartunit sulinngiffeqarnissani nalunaarutigippagu.

Partii Naleqqap taamatut alliartoruusaarnini ingerlateqqissaguniuk Siumumit qinersisinit tigooraanini suli alliseqqissinnaavaa taamaattumillu ukiuni tulliuttuni partiimi qanoq pisoqarumaarnersoq pissaganarpoq.

Atassut:

Atassut qinigaaffik kingulleq ingerlasoq Inatsisartuni ilaasortaatitaaruppoq taamaattumillu atsiornernik katersisariaqaqqissimalluni Inatsisartunut qinersinissaq sioqqullugu. Atassutillu ukiuni amerlisuni milliartornera ilutigalugu eqqarsaatiginarsinikuugaluarpoq Atassut Inatsisartunut uani qinersinermi isertitaqanngittooruni siunissaa apeqqusernartupilussuussasoq. Taamaattoqanngilarli;

Atassutip ingerlaqqinnnerminut Inatsisartunilu ilaasortaatiaqaqqilernermingut torrallaaqqutigivaa inuusuttorpassuarnik piukkunnartunik siulersorneqarlunilusooq qineqqusaarsimanera uanilu siulittaasuusoq Siverth K. Heilmann nersualaagassaavoq qineqqusaaqatiminut inuusuttortaminut tatiginnilluni qineqqusaartitsinera. Taamaattumillu Naalakkersuisooqataalernerup kingorna Naalakkeruisunngortussap Inatsisartuni sulinngiffeqarnissani kissaatigippagu inuusuttumik allamik isertoqassammat. Atassutip kinguaariit nikeriarnerat nukittooq takutippaat taamaattorlu Atassummut qinersisartunut tatiginartumik siunissaqartumillu oqaatigineqarsinnaalluni.

Atassut Inatsisartuni marluinnarnik isertitaqarnini kinguariaatiginngilaa, partiimmi allat marluk nutaajusut tamarmik ataatsimik isertitaqarput taamaattumillu Atassut nunatsinni partiini minnersaasutut taaneqarsinnaanani.

Nunatta Qitornai:

Nunatta Qitornai partiit nutaajusut marluk aapparivaat uanilu qinersinermi ataatsimik Inatsisartunut ilaasortaatiaqalerlutik. Vittus Qujaukitsup Naalakkeruisooqataalernissaanut atatillugu qinersinermi qinigaalluartussatut ilimagineqartoq Aleqa Hammond Inatsisartunut isertussanngorpoq, Aleqa Hammondili 171-iinnarnik taajuunneqarpoq siornatigut nunatsinni qinigaanerpaajusarnikuulluni 2013-mi Inatsisartunut qinersinermi 6.818-raarnikuulluni.

Taamaattorli politiikerit taakku marluullutik annertuumik tusagassiorfinnit malersorneqarput iliuuserisimasaat pillugit kisiannili Naalakkeruisooqataalernerisa kingorna Inatsisartuni nunatsinnilumi politikkimi nipituuliortuutaalluarsinnaasut isummatillu kusassarpallaaragit annittarneri politikkimut eqeersaataalluarnissaat ilimanarsinnaavoq. Nunatta Qitornaasa siunissaat uuma qinersinerup ingerlanerani paasinarsissooq qanoq ingerlariaqqissanersut alliartorsinnaanissaalli politikkikkut takutitilluarnermik kinguneqartariaqarnerat naatsorsuutigineqarsinnaalluni.

Suleqatigiissitsisut:

Uani qinersinermi partiit nutaajusut aappaat taamatuttaaq ataatsimik Inatsisartuni ilaasortaatitaqalerput, pissaganarporlu uani qinigaaffimmi qanoq sunniuteqaqataasinnaanerat.

Uanili maluginiagassaavoq partiip siulittaasua Michael Rosing Inatsisartunut isinngimmat paarlattuanilli partiimi aallarnisaaqataasoq Tillie Martinussen Inatsisartunut 480-nit taajuunneqarluni ilaasortanngorluni. Taamaattumillu Demokraatinut unammillertaaniarnerat immaqa iluatsippallaanngittutut qaaneqarsinnaalluni, pissanganarporli qanoq sunniuteqassanersut uumap qinigaaffiup ingerlanerani.

Kaaleeraq Møller Andersen





? ??KNR1 KNR2 ??DR1 DR2 DR3 DR Kultur ?????Sky News BBC France 24 Bloomberg

? ??Radio24syv DR Radioavisen DR P1 Orientering  DR P1 Nyheder fra Grønland på dansk P1 P2 P3

 

Hvad mener du om Lufthavnene? Du har op til 6 svarmuligheder

View Results

Indlæser ... Indlæser ...

Kalaallit Nunaat namminersornissaa kissaatigaajuk? - Ønsker du at Grønland skal være selvstændig?

View Results

Indlæser ... Indlæser ...
Translate »